Site Name

(Madda Oduu ABO/MOA/Sadaasa 15,2009) Ayyaanni seena-qabeessi kun guyyaa kaleessaa Sanbat-duraa (Saturday) Sadaasa (November) 14, 2009 yeroo kabajametti miseensotni ABO naannicha jiran, Sab-boontotni ilmaan Oromoo fi hawaasni Oromoo walii galaa heddumminaan irratti hirmaachuudhaan guyyaa seena-qabeessa kanatti yaadannoo seena qabeessa taheen kabajaa oolan.

Akkuma amaleeffatametti ayyaanni kun eebba jaarsolii Oromoon banamee, faaruu tokkummaa Oromoo fi Alaabaa Oromiyaa dhaadhessuun sirna ho’aan baname.

Haasawa seenaa FDG kana ilaalchisee godhaman keessaa:

• Jaal Gaashuu Lammeessaa MGS ABO, yaamicha qabsoo Addi Bilisummaa Oromoo Sadaasa 9 bara 2005 dhiheesseef osoo oolanii hin bulin bartootni Oromoo owwaannaa hatattamaa taasisaniin, ilmaan Oromoo golee Oromiyaa cufa keessaa sossoose kun itti fufiinsi fincila diddaa bittaa alagaa irratti Oromoon barootaaf gochaa ture akka jabaatee itti fufu taasisuu isaa dubbatan.
• Keessummaa kabajaa keessaas Obbo Goolee Baasoo fincilli ilmaan Oromoo gaggeessaa jiran fi itti wareegamaa har’a gahan kun saba keenya dukkana gabrummaa fi roorroo jala jiru ifa bilisummaatti fiduu waan taheef ilmaan Oromoo bakka jiranii waan danda’aniin hidhaa gabrummaa jalaa bahuuf falmachuun, tokkummaa saba ofiis eeggachuun hedduu barbaachisaa tahuu gadi faggeessanii ibsan.

Ayyaana kana akkaan miidhegsuu keessatti qooda guddaa kan fudhatan aartistoota ilmaan Oromoo turoo kanneen akka obbo Afandii Siyyoo fi jaalatamtootni wallistootni kan biro kan akka Kumalaa Addunyaa, Tasfaayee Dhimmaa fi k.k.f. sirna kabajatnaa kana surra-qabeessa taasisaa oolaniiru.

Itti aansees guyyaa FDG kana jabeessuuf birmatnaa godhamu keessaa tokko humna dinagdeen itti irmachuu tahuu kan dubbatan Jaal haayilee Tolaa:

“Fincila Diddaa Gabrummaa ani of irratti finciluudhaanin jalqabe. Sadaasa 9 bara 2008 hamma Sadaasa 9 2009 of irratti fincileen guyyaatti $Aus 1:1 (tokko tokko) ol kuusuu jalqabe. Kunoo har’a $Aus 365 (dhibba sadii fi jaatamii shan) FDGf galii godheen jira. Kanab finial kana mee dura of irraa haa jalbanu” jedhan. Of-irratti murtiin akkanaa kun kaaniif illee fakkeenya akka tahuu danda’u hirmaattotni ayyanichaa hark-rukkuttaa ho’een dhugoomsanii jiran.

Guyyaa kana guutummaan kabajatnaa FDG jalqabaa hanga xumuraatti hordoftootaaf jihaa paltalk dhaan tamsaasamaa oole.

Xumura:

• Aartisttii Oromoo turaa  turaa fi maqaa Oromoo biyya alaatti beeksisuuf bara 1980ta keessa tattaaffii jajjabduu gochaa kan ture;
• Yeroo baay’inni Oromoo biyya alaa kana keessatti hedduu waakkii ture keessa alagaa afaan Oromoo hin beekne leenjisatee waltajjii ambaa irratti maqaa Oromoo kan beeksisaa ture Obbo Afandii Siyyoo mee hidhaa sararaa kanaa gadii kana furaatii dowadhaa.

MOA